بلقيس ايڌي
بلقيس ايڌي
بلقيس ايڌي: پاڪستان جي مھا سماجي ڪارڪن عبدالستار ايڌيءَ جي گهرواري بلقيس ايڌي به نامياري سماجي ڪارڪن هئي. هوءَ 14 آگسٽ 1947ع تي ڪراچيءَ ۾ ڄائي. هيءَ بلقيس ايڌي فائونڊيشن جي سربراهه هئي، جنھن کي سندس سماجي خدمتن جي عيوض هلال امتياز ۽ لينن پيس پرائيز به مليا. سندس نگراني هيٺ پاڪستان، خاص ڪري ڪراچيءَ ۾ اسپتال ۽ ايمرجنسي سروس هلندي هئي. بلقيس ايڌي نرسز ٽريننگ سينٽر مان ننڍي عمر ۾ ئي نرسنگ جو ڪورس ڪيو. عبدالستار ايڌي سندس سڱ گهريو ۽ اپريل 1966ع ۾ سندن شادي ٿي ويئي. تڏهن کان هن عبدالستار ايڌي سان گڏ پاڪستان جي سڀ کان وڏي فلاحي اداري ۾ ماڻهن جي خدمت ۽ ڀلائي لاءِ ڪم ڪرڻ شروع ڪيو. جڏهن هن ستار ايڌيءَ سان شادي ڪئي ته سندس مڙس جي ڪُل ملڪيت هڪ ڀڳل ٽٽل ڪار ۽ ننڍڙي ڊسپينسري هئي. پھرين ماڙ تي 7-6 بسترن وارو ويم گهر هو ۽ هيٺ ننڍڙي ڪمري ۾ آفيس هئس. هوءَ بم ڌماڪن جي فوتين جي ميتن کي تَڙُ ڏيندي هئي. بلقيس ايڌي عورتن واري شعبي جي نگران هئي ۽ ٻارن کي هَنج وٺڻ وارو ڪم به هُن پنھنجي ذميواري سمجهي نڀايو. سندس ٻه ڌيئرون به ساڻس گڏ ڪم ڪنديون هيون. هوءَ وقت بوقت سڄي ملڪ ۾ قائم ايڌي سينٽرن جو معائنو ڪندي رهندي هئي. ٻارن کي هَنج ڏيڻ لاءِ سندس اصول اهو هو ته هَنج وٺندڙ جوڙي کي شادي ڪئي، 12-10 سال ٿي چڪا هجن. مرد جي عمر 50 سالن کان گهٽ هجي ۽ سندس پگهار مناسب هجي ۽ گهر پنھنجو هجي. هو اهڙن جوڙن کي ٻار هَنج ۾ نه ڏيندي هئي، جيڪي مسواڙي هجن يا گهر مٽائيندا هجن. جسماني ۽ ذهني طور معذور ٻارن جي به ايڌي فائونڊيشن ۾ پرگهور لڌي ويندي آهي. معذور ٻارن کان علاوه ايڌي وٽ هزارين اهڙن ٻارن جون درخواستون آهن، جيڪي يتيم يا لاوارث آهن ۽ اڃا ڪنھن هَنج نه ورتا آهن. بلقيس ۽ ستار ايڌيءَ کي پنھنجو ذاتي گهر ڪونه هو. سماجي خدمتن ۾ رڌل هن جوڙي کي گڏجي سير تفريح لاءِ ڪو وقت نه ملندو هو. البته هو سماجي ڪم گڏجي ڪرڻ ۾ ئي وقت گذاريندا هئا. کين هڪ پٽ فيصل ۽ ٽي ڌيئر ڪبريٰ، زينت ۽ الماس جو اولاد آهي. بلقيس ايڌي 15 اپريل 2022ع تي ڪراچيءَ ۾ وفات ڪئي.
لفظ بلقيس ايڌيھيٺين داخلائن ۾ پڻ استعمال ٿيل آھي
داخلا ۾ استعمال ٿيل تاريخون
1947.08.14 عيسوي
بلقيس ايڌي 14 آگسٽ 1947ع تي ڪراچيءَ ۾ ڄائي.
2022.04.15 عيسوي
بلقيس ايڌي 15 اپريل 2022ع تي ڪراچيءَ ۾ وفات ڪئي.
شخصيتون - ڀاڱي جون ٻِيون داخلائون
استاد جمالو خاناسٽوئرٽ پگٽ
علي مير شاهه
امان الله شيخ
ٽڪا خان
سيد شفقت حسين موسوي
پليجو عبدالرحمان
شادي شهيد فقير
امر لغاري
آنند ٽهلراماڻي